نخوة للباقر عليه السلام " لطمية مكتوبة"

ناخيه الباقر...والدمع ناثر
ادخيل لتردني...واجبر الخاطر

جيت للماتم...ودمعي أسيلة
أصرخ يالباقر...انت الوسيلة
ابجاه أبو فاضل ...كافل العليلة
فرج اهمومي...والقلبي جابر

يالذي محتار...وزادت أحزانك
إنخه الباقر...يرحم الحالك
وصيح يامولاي...جيت إعلى بابك
من تنادي إعليه...ماتظل حاير

نخوة يالباقر...لاتخيبنا
ولاتصد بالعين...إدخيل لاتردنا
كلنا مهمومين ...إنريد تحضرنا
وانت باب الجود...وللطلب حاضر

كلنا يالباقر...جيناكم خطار
ننتخي بسمك...والدمع نثار
ونقسم بالزهرة...والعترة لطهار
وكلمن الجفه...للدعا ناشر

إدخيل يالباقر...اسمع النخوة
كلنا هالليلة...جيناكم عنوة
إبزينب الخاتون...يالمشت قوة
رفجت الحادى...وهيه إبلا ستار

إبمجلسك جينا...نعقد النية
ونزلت الدمعة...بالخد جرية
وننذر الليلة...إتزول البلية
وكل قلب محزون...للفرج ناطر

نطلب الباقر...خامس اليمه
يمسح إبإيده...ويكشف الغمة
كل حزين اليوم...ينجلي همه
هذا بو الصادق...للكسر جابر

وانخه الباقر...وبسمه أنادي
إبجاه أبو السجاد...عطني امرادي
وتحفظ الشبان...وتهدي أولادي
بحما الله وحماك...جيتك يالباقر

يالقضى مسموم...سمته العدوان
شافي هالعله...وساعد الحيران
واللي من اسنين...إمن المرض تعبان
ينتظر لمراد...وللبلا صابر

يالشاف إبعينه...كل الضحايا
إمجزرة بالشمس...في كربلايا
قوم خلصنا...من هالبلايا
شاهد الأجساد...إبيوم عاشر

ياللي إبعينك...شفت المصايب
والأهل كلها...فوق الترايب
وشفت عماتك...وسط الخرايب
وبالحبل مجتوف...والدهر جاير